Жол қауіпсіздігін қамтамасыз ету үшін Түркістан облысының полиция қызметкерлері күнделікті патрульдік қызметтен бөлек, әлеуметтік желілерді де тұрақты бақылауда, деп хабарлайды Polisia.kz.
Тұрақты қадағалау барысында полиция қызметкерлері бірқатар заң бұзушылықтарды анықтап, кінәлі жүргізушілер жауапқа тартылды. Түркістан облысының полиция патрульдері Алматы-Ташкент-Термез тас жолында автоколоннада жүріп бара жатқан бірнеше көліктің бейнежазбасын көргенде назар аударды.
Полицейлер видеодағы көліктерді іздеді. Бұл көліктер жол ережесін бұзып, басқа көліктердің қозғалысына кедергі келтірген.
Нәтижесінде екі Mercedes-Benz көлігінің жүргізушілерінің жеке тұлғалары анықталды. Олар Сайрам ауданының тұрғындары болып шықты.
Жол қозғалысы ережесін бұзушыларға түсіндіру жұмыстары жүргізілді. Сонымен қатар, төтенше жағдайға әкеп соқтыратын жол қозғалысы ережелерін бұзған жастарға қатысты әкімшілік шаралар әзірленді.
Сонымен қатар, видеодағы басқа көліктердің жүргізушілерін анықтап, жауапкершілікке тарту жұмыстары жүргізілуде.
Жүргізушілердің жол қозғалысы тәртібін арттырып, жол-көлік оқиғаларын азайту мәселесі – әрқайсымыз үшін маңызды мәселе. Сондықтан полицейлер жүргізушілерге жолда абай болып, жол ережесін қатаң сақтауға кеңес береді.