Батыс Қазақстан облысының Жәнібек ауданында полицейлер алаяқтықты анықтап, жәбірленушіге 700 мың теңгені қайтарды, деп хабарлайды Polisia.kz.
Жәнібек полиция бөлімінің қызметкерлері «Алаяқтыққа қарсы» жедел алдын алу шарасы барысында Instagram желісі арқылы жасалған алаяқтық фактісін анықтады.
Қазан айының басында 20 жастағы бойжеткен Instagram желісі арқылы танысып, сөйлескен жігітке 700 мың теңге аударған. Ол Таиландқа жеңілдетілген бағамен сапар ұйымдастыруға уәде берді. Алайда сапар ешқашан ұйымдастырылмаған және ақша белгісіз бағытта ағып кеткен.
Жедел іздестіру шарасы барысында полицейлер күдіктіні қолға түсірді. Нәтижесінде жәбірленушіге келтірілген шығын толығымен өтеліп, барлық ақша оған қайтарылды.
Алаяқтық фактісі бойынша сотқа дейінгі тергеу амалдары жүргізілуде.
Жәбірленуші полиция қызметкерлеріне қылмысты тез арада ашып, ақшаны қайтарғаны үшін алғысын білдірді.