Кез келген тұрғын осы байланыс орталығына хабарласып, интернет-алаяқтық, қорғау әдістері, сондай-ақ алаяқтық деп танылған сайттар мен парақшалар туралы ақпарат ала алады, деп хабарлайды Polisia.kz газеті.
Қаржылық қауіпсіздік пен халықтың білім деңгейін арттыру және интернет-алаяқтықтың алдын алу мақсатында Атырауда полиция басқармасы мен цифрландыру орталығы бірлескен іс-шаралар туралы меморандумға қол қойды.
Бұл меморандум облыс тұрғындары мен қонақтарын интернет-алаяқтықтан қорғауға және «109» байланыс орталығының жұмысы арқылы интернет желісінде жасалған қылмыстардың алдын алуға бағытталған.
Меморандум аясындағы бірлескен жұмысты «109» байланыс орталығы, криминалдық полиция басқармасы және киберполиция жүргізеді. Хаттамаға қол қою алдында тараптар ынтымақтастықтың күтілетін нәтижелерін және орталық операторын ақпараттық қамтамасыз етуді талқылады. Жиында Атырау облысы ІІД полиция басқармасының бастығы Нұрхат Уразбаев интернет-алаяқтықпен күресу және азаматтарды қылмыстың барлық түрінен қорғау үшін ресурстарды тиімді пайдаланудың маңыздылығын, сондай-ақ адамдармен бірлесіп жұмыс істеу қажеттігін атап өтті.
Айта кетейік, Атырау облысында тәулік бойы жұмыс істейтін «109» байланыс орталығы 2020 жылдан бері жұмыс істейді. Орталықта тұрғындардың өтініштеріне жауап беретін 40 қызметкер бар. Өңірдегі өзекті мәселелер туралы өзекті ақпаратпен қамтамасыз етуді мақсат еткен жүйе енді желідегі қиянаттың алдын алуға да септігін тигізбек.
Бөлім қызметкерлері орталықпен үздіксіз кері байланыс орнатуды және жұмыс тиімділігін арттыру үшін семинарлар мен дөңгелек үстелдерді өткізуді жоспарлап отыр.