Бразилия Әскери-әуе күштерінің авиациялық оқиғаларды зерттеу және талдау орталығы Қазақстанның Ақтау қаласының маңында апатқа ұшыраған Әзірбайжан әуе жолдары (AZAL) ұшағының қара жәшігін декодтауды аяқтады. Бұл туралы бразилиялық G1 порталына министрліктегі дереккөздер хабарлады. «Екі жазу құрылғысынан деректерді алу, жинау және тексеру аяқталды», — деді олар. Сонымен бірге, «O Globo» газеті атап өткендей, министрлік Қазақстан билігіне тиісті ақпаратты жеткізді. Әзірбайжан астанасы Бакуден Грозныйға ұшқан Әзірбайжан әуе компаниясының Embraer жолаушылар ұшағы 25 желтоқсан күні таңертең Қазақстанның Ақтау әуежайында апатқа ұшырады. Ұшақ апатқа ұшырамас бұрын экипаж шұғыл қонуды сұраған. ҚР Төтенше жағдайлар министрлігінің мәліметінше, ұшақта 69 адам, оның ішінде 5 экипаж мүшесі болған. ҚР Премьер-министрінің орынбасары Қанат Бозымбаев зардап шеккен 29 адам ауруханаға жеткізілгенін айтты.
