Полицейлер кезекшілік кезінде такси жүргізушісі әйелге шабуыл жасаған Астана тұрғынын ұстады, деп хабарлайды Polisia.kz.
26 қарашада Целиноград облысында такси жүргізушісі әйелді жарақаттаған қылмыс орын алды. Оның айтуынша, Қоянды ауылына апаруға келіскен жолаушы сапар кезінде оған шабуыл жасап, заңсыз әрекетке барған.
Қылмыс жасағаннан кейін қаскүнем жәбірленушінің қолма-қол ақшасы мен ұялы телефонын алып, оны далаға қалдырып, көлігін ұрлап кеткен. Жақын маңдағы елді мекенге келген әйел оқиға туралы дереу полицияға хабарлаған.
Ақмола облысының криминалдық полиция басқармасының қызметкерлері жәбірленушіден сұхбат алып, қылмыс белгілері мен оқиғаның мән-жайын зерттеді. Қылмыс туралы хабарламаларға дер кезінде ден қою және кешенді жедел іздестіру шараларының арқасында санаулы сағаттардың ішінде елордада ұсталған күдіктінің жеке басын анықтауға мүмкіндік туды.
Қазіргі уақытта сотқа дейінгі тергеу амалдары жүргізіліп, іске қатысы бар адам уақытша ұстау изоляторына қамалды. Күдіктіге қатысты бірнеше қылмыс, соның ішінде көлік ұрлау, тонау бойынша қылмыстық іс қозғалды.