Жол-көлік оқиғаларының алдын алу және жүргізушілер мен жолаушылардың қауіпсіздігін қамтамасыз ету үшін Ақтөбе облысының жолдарында полиция қызметкерлері тәулік бойы кезекшілік етуде, деп хабарлайды Polisia.kz.
Тәртіп сақшылары жол қозғалысын реттеп, қиын жағдайда көлік жүргізушілеріне көмек көрсетеді.
Бір күннің ішінде ауа райының қолайсыздығынан аудандағы жолдарда 30 көлік соқтығысып, 4 көлік шұңқырға аударылып кеткен. Зардап шеккендер жоқ.
Ағымдағы жылдың 5 қарашасында сағат 10-дар шамасында Ақтөбе-Орынбор тас жолында Мәртөк ауылының маңында жол-көлік оқиғасы орын алды; MAN жүк көлігінің жүргізушісі тізгінге ие бола алмай, көлік аударылып кеткен. Жүргізуші зардап шеккен жоқ.
Ауа райының қолайсыздығына және қар түріндегі жауын-шашынға байланысты жол қозғалысына қатысушылардың барлығын барынша мұқият және сақ болуға шақырамыз.