Жамбыл облысында полиция департаментінің экстремизмге қарсы күрес бөлімі прокуратурамен келісе отырып, тұрақты экстремистік діни топтың 11 мүшесін қолға түсірді, деп хабарлайды Polisia.kz.
Олар әлеуметтік желілерде өздерінің негізгі дінін ұстанатындардың артықшылығын және басқа конфессия өкілдерінің төмендігін дәріптейтін, діни сезімдерін қорлайтын аудио-бейнематериалдар, соның ішінде шетелдік экстремистік миссионерлердің уағыздарын таратқан. Аталған материалдардың кейбіріне бұрын діни араздықты қоздырғаны үшін Қазақстан Республикасының аумағында таратуға соттар тыйым салған болатын.
Олардың тұратын жерін тінту барысында көптеген діни құжаттар мен басқа да айғақтар тәркіленді.
Тексеру қорытындысы бойынша бұл құжаттарда діни араздықты насихаттау белгілері бар.
Топ жетекшілері мен белсенді қатысушыларының ішінде төрт күдікті қамауға алынды, қалғандары қылмыстың куәгерлері ретінде кінәларын мойындады.
Бір топ адамдардың діни араздықты қасақана қоздыру белгілерін анықтау мақсатында сотқа дейінгі тергеу амалдары жүргізілуде.