Өткен демалыс күндері елордалық тәртіп сақшылары бір күнде жоғалып кеткен екі ұялы телефонды тауып, иелеріне қайтарды, деп хабарлайды Polisia.kz.
Байқоңыр ауданында патрульдік қызметті атқарған ҚР ІІМ Ұлттық ұлан 5573 әскери бөлімінің сақшыларына iPhone 14 Pro Max телефонының жоғалғаны туралы хабарлама сағат 19:32 шамасында түскен.
Ақпаратты алған әскер басшысы, қатардағы жауынгер Инсар Дүйсенбеков қатардағы жауынгерлер Аслан Махамбетов пен Әліби Оңгелдімен бірге жедел іздестіру жұмыстарын ұйымдастырды.
Күзетшілердің қырағылығының арқасында жоғалған телефон «Астаналық» базарының жанындағы тұрақтан табылды. Табылған смартфон иесіне қайтарылды.
Екінші оқиға сағат 20:21 шамасында Байқоңыр ауданында қоғамдық тәртіпті қорғау бойынша кезекшілік кезінде болған. Патрульдік қызметте әскери жасақ бастығы, қатардағы жауынгер Диас Әмір қатардағы жауынгерлер Қуаныш Тіркешов пен Бекзат Раушанмен бірге жоғалған IPhone 15 Pro ұялы телефоны мен сымсыз құлаққаптың орналасқан жері туралы анықтама алды. Жоғалған заттар табылып, иелеріне қайтарылды.
Әскери борышын өтеу кезіндегі қырағылығы мен адалдығы үшін жас жігіт сарбаздарға алғысын білдірді.