Түркістан облысында полицейлер 437 миллион теңге көлемінде шығын келтірген заңсыз қиыршық тас өндіруші топтың әрекетін тоқтатты, деп хабарлайды Polisia.kz.
Белсенді жедел-іздестіру шарасының нәтижесінде полицейлер Түркістан облысы Келес ауданында жер астын заңсыз пайдаланумен айналысқан бір топ азаматтың әрекетінің жолын кесті.
Түркістан облыстық полиция департаментінің ұйымдасқан қылмысқа қарсы күрес басқармасының қызметкерлері заңсыз пайдалы қазбаларды (қиыршық тас) сатумен айналысқан төрт күдіктіні қолға түсірді. Келтірілген шығын 437 миллион теңгеден астам.
Тәртіп сақшылары іздестіру шаралары барысында күдіктілерден 1 экскаватор, 1 доңғалақты тиегіш, 4 жүк көлігі және басқа да айғақты заттарды тәркіледі.
Қазіргі таңда аталған факті бойынша қылмыстық іс қозғалып, істің барлық мән-жайын анықтау мақсатында жедел-іздестіру шаралары жүргізілуде.