Атырау облысында жүздеген көліктер мен шаруа қожалықтары тексеріліп, қылмыскерлер тобы құрықталып, ұрланған мал иелеріне қайтарылды, деп хабарлайды Polisia.kz.
18-20 қараша аралығында Атырау облысында мал ұрлығының алдын алу, жолын кесу және ашу, сондай-ақ қылмыстық әрекеттерге қатысы бар адамдарды анықтау мақсатында «Мал ұрлығы» жедел-алдын алу шарасы өткізілді.
Шара аясында мал мен ет өнімдерін тасымалдайтын 292 көлік, ет өнімдерін сататын 86 орын және 267 шаруа қожалығы тексерілді. Шалғай аудандарды, қыстауларды, колхозшыларды тексеру жұмыстары да жүргізілді. Операция барысында азаматтық және мемлекеттік қызметтік қару мен патрондарды сатып алу, сақтау, пайдалану және тасымалдау ережелерін бұзғаны үшін бес әкімшілік қаулы құрастырылды.
Мал мен ет өнімдерін жарамды құжатсыз тасымалдаудың 23 фактісі және құжатсыз сауданың 8 фактісі анықталды. Аталған заң бұзушылықтарға байланысты 31 адам әкімшілік жауапкершілікке тартылып, салынған айыппұлдың жалпы сомасы 1 миллион теңгеге жуықтады.
Сондай-ақ, шаруа қожалықтарында малды бақылаусыз бағудың 194 фактісі де тіркелді.
Тексеру және рейд жүргізу арқылы мал ұрлығымен айналысқан бір топ қылмыскер қолға түсті. Олар бес ұрлыққа қатыстылығын анықтады, оның екеуі «өткен жылдарда» орын алған және үшеуі бұрын жасалған. Осы шаралардың арқасында 19 бас ірі қара иелеріне қайтарылды.