Түркістан облысында полицейлер заңсыз көші-қон арналарына тосқауыл қойып, іздеуде жүрген тоғыз шетелдікті ұстады, деп хабарлайды Polisia.kz.
Түркістан облыстық полиция департаментінің жедел бөлімшелерінің қызметкерлері бірқатар қылмыстық топтар мен заңсыз көші-қон арналарын әшкерелеп, іздеуде жүрген қылмыскерлерді қолға түсірді.
Ұйымдасқан қылмысқа қарсы күрес басқармасының қызметкерлері шетелдіктерге шекараны заңсыз кесіп өтуге көмектескен, соның ішінде жалған құжат жасаған бір топ адамды құрықтады. Күдіктілер Түркістан облысы мен Шымкент қаласының бес тұрғыны болып шықты, олардың екеуінің соттылығы бар. Олар уақытша ұстау изоляторына қамалды.
Сонымен қатар, көрші мемлекеттің 10 азаматының шекарадан өтуіне жағдай жасаған Сарыағаш ауданының екі тұрғыны анықталды. Ұсталған шетелдіктердің көші-қон тәртібін өрескел бұзғаны анықталды.
Сондай-ақ биылғы жылы ДПД экстремизмге қарсы күрес басқармасы көршілес елдер іздеуде жүрген 9 қылмыскерді қолға түсірді. Олардың үшеуіне қатысты Қазақстан мемлекеттік шекарасын қасақана кесіп өткені үшін сотқа дейінгі тергеу амалдары жүргізілді. Жыл басында өз еліндегі түрмеден қашып кеткені үшін 2021 жылдан бастап халықаралық іздеуде жүрген көрші елдің азаматы қамауға алынды; қашқан соң шекараны заңсыз кесіп өткен.
ҰҚК қызметкерлері ҰҚК шекара қызметімен бірлесіп, шекарадан өтпек болған кезде қылмыс жасағаны үшін 2017 жылдан бері іздеуде жүрген көрші елдің азаматын қолға түсірді.
Барлық тексерілген фактілер бойынша сотқа дейінгі тергеп-тексерулер жүргізіліп, заңға сәйкес бірқатар шаралар қабылданды.