Жаңа жыл мерекесі қарсаңында полиция қызметкерлері жедел алдын алу шаралары аясында Төтенше жағдайлар департаментінің қызметкерлерімен бірлесіп 30-ға жуық рейд өткізіп, отшашу өнімдерінің заңсыз айналымына қатысты 170-тен астам деректі анықтады деп хабарлады Polisia.kz. .
Сертификатталмаған 728 отшашу бөлімшесі кері қайтарылып, тәртіп бұзушыларға 7,5 миллион теңгеден астам айыппұл салынды.
Полиция отшашу өнімдерін пайдалану кезінде жарақат алудың алдын алуға да баса назар аударады. Өйткені, петардалар мен отшашуларды дұрыс ұстамау ауыр зардаптарға әкелуі мүмкін.
Шара барысында тәртіп сақшылары отшашуларды атқылайтын сертификаты жоқ сатушыларды тексеріп қана қоймай, азаматтармен отшашу өнімдерін сатып алу және пайдалану кезінде абай болу керектігі жөнінде түсіндірме әңгімелер жүргізеді.
Өз кезегінде полицейлер адамдарды қауіпсіздік ережелерін бұзбауға, соның ішінде жабық орындарда және адамдар көп жиналатын жерлерде отшашуды қолданбауға шақырды. Отшашу өнімінің өзі нормативтік стандарттарға сай болуы керек.
Естеріңізге сала кетейік, «Фейерверк» жедел-профилактикалық іс-шарасы сертификаты жоқ пиротехникалық өнімдерді заңсыз өндіру және сату фактілерінің алдын алу және шындықты анықтау мақсатында өткізілуде. Бұл бағыттағы жұмыстар тұрақты бақылауда және алдағы уақытта да жалғасын табады.