ІІМ Киберқылмыспен күрес басқармасы мен Қарағанды облыстық полиция департаменті бірлесіп жүргізген жедел-іздестіру шарасының нәтижесінде көршілес елдердің бірінің 22 жастағы азаматы қолға түсті. Polisia.kz хабарлағандай, ол кейіннен азаматтарды алдау үшін абоненттің мобильді құрылғысының сәйкестендіру кодын заңсыз өзгерткен деген күдікке ілінген.
Тінту кезінде дыбыс күшейткіштің атын жамылған арнайы техника тәркіленді. Ол банк қызметкерлерінің және құқық қорғау органдарының атынан Қазақстан Республикасының азаматтарына жаңылыстыру және алаяқтық әрекеттерді жүзеге асыру мақсатында қоңырау шалу үшін қолданылады.
Ұсталғанның жалға алған пәтерінен келесі заттар табылды:
• 2100-ден астам SIM картасы,
• екі ноутбук,
• екі ұялы телефон,
• таблеткалар.
Тәркіленген техникаға қатысты 48 абоненттік нөмірден тұрғындарға қоңырау шалылғаны анықталды. Қазіргі уақытта ұсталған азаматтың басқа да алаяқтыққа қатыстылығы анықталуда.
Аталған факті бойынша қылмыстық іс қозғалды. Ұсталған азамат прокуратурамен жасалған келісімге сәйкес қамауға алынды. Тергеу жалғасуда.