Түркия бесінші буынды (5G) мобильді байланысты 2026 жылы іске қосуды жоспарлап отыр. Бұл туралы президент Тайып Ердоған өзі төрағалық еткен министрлер кабинетінің отырысынан кейін халыққа арнаған видео үндеуінде мәлімдеді.
«Біз 2025 жылы ұлттық 5G байланыс желісін құру жобасы аясында тендер өткіземіз және біз алғашқы сигналдарды 2026 жылы алуды жоспарлап отырмыз», — деді Ердоған.
Көлік министрлігінің басшысы Әбділқадир Уралоғлы Түркияда 5G желісін тестілеу басталғанын бұған дейін хабарлаған болатын. Оның айтуынша, 30 ұйым оларды пайдалануға рұқсат алған, соның ішінде Ыстамбұл халықаралық әуежайы да бар.
Республикадағы ұялы байланысты пайдаланушылар саны 87 миллионға жуық. Оның ішінде 81 миллионға жуық адам 4,5G желісін пайдаланады.